Categorías
Uncategorized

Video: Perseverance aterrando en Marte

Créditos do video: NASA/JPL-CaltechMars 2020 Mission Team

Explicación: como é aterrar en Marte? Para ter unha mellor monitorización dos instrumentos implicados na entrada, descenso e aterraxe do rover Perseverance en Marte a semana pasada, incluíronse cámaras con capacidade de vídeo que retornaron agora as imaxes captadas. A composición de 3 minutos e medio amosa o comezo da manobra ca apertura do inmenso paracaídas que frea á nave cando entra na atmosfera marciana. A continuación o escudo térmico sepárase e cae. Mentras Perseverance descende, Marte faise máis grande na vista e o detalle da superficie aumenta. Despois de 2 minutos no vídeo, o paracaídas é liberado e Perseverance comeza a aterraxe cos seus foguetes que levantan o po da superficie. A grúa voadora (Sky Crane) pousa a Perseverance suavemente na superficie e axiña lisca do lugar. O rover robotizado Perseverance comezará agora a súa exploración do antigo cráter Jezero, incluíndo a busca de sinais de vida que existiran algunha vez no planeta veciño da Terra.

Categorías
Uncategorized

A Lúa elévase entre as naves estelares

Créditos da imaxe e copyrightJohn Kraus

Explicación: Que é iso a ambos os dous lados da Lúa? Starships. En concreto, trátase de foguetes reutilizables de lanzamento e retorno, desenvolvidos por SpaceX para elevar carga e eventualmente seres humanos desde a superficie da Terra ao espazo. Os dous foguetes fotografados son o SN9 (número de serie 9) e o SN10, que foron captados preto da súa plataforma de lanzamento en Boca Chica, Texas, o mes pasado, posando baixo a Lúa chea de xaneiro. As Starships albergan motores de metano líquido dentro de resistentes carcasas de aceiro inoxidable. A SN9 foi lanzada a principios deste mes e funcionou ben, coa excepción dun foguete interno que non se acendeu durante o descenso a motor. A SN10 segue sendo sometida a probas en terra e podería ser lanzada a finais deste mes.

Categorías
Uncategorized

NGC 2244: Un cúmulo estelar na Nebulosa Roseta

Créditos da imaxe e CopyrightDon Goldman

Explicación: No corazón da Nebulosa da Roseta atópase un brillante cúmulo aberto de estrelas que ilumina a nebulosa. As estrelas de NGC 2244 formáronse a partires do gas circundante fai só uns poucos millóns de anos. A imaxe destacada, tomada en xaneiro empregando múltiples exposicións e cores moi específicas do Xofre (sombreado en vermello), Hidróxeno (verde), e Osíxeno (azul), captura a rexión central con grandísimo detalle. Un vento de partículas afástase do cúmulo de estrelas e contribúe a unha xa complexa colección de filamentos de gas e po mentres vacía paseniñamente o centro do cúmulo. O centro da Nebulosa da Roseta mide uns 50 anos luz de diámetro, atópase a uns 5.200 anos luz de distancia, e é visible con prismáticos cara a constelación do Unicornio (Monoceros).

Categorías
Uncategorized

Perseverance: como aterrar en Marte

Créditos da imaxe: NASAJPLMars 2020

Explicación: Pendurada baixo a súa etapa de descenso propulsada por foguetes, Perseverance colga só uns poucos metros por riba da superficie marciana, capturada aquí momentos antes da súa aterraxe o 18 de febreiro no Planeta Vermello. A impresionante vista foi posterior a unha intensa viaxe de 7 minutos dende a parte superior da atmósfera marciana. Parte dun vídeo de alta resolución, a imaxe tomouse dende a etapa de descenso durante a manobra final de aterraxe mediante grúa aérea. Tres cables mecánicos duns 7 metros de lonxitude son visibles suxeitando a Perseverance, xunto cunha conexión eléctrica umbilical que proporciona sináis (coma esta imaxe) a un computador a bordo do rover do tamaño dun vehículo. Baixo Perseverance os fluxos de po marciano levántanse dende a superfice debido ós motores dos foguetes de descenso. Inmediatamente despois da amartizaxe, os cables liberáronse permitindo á etapa de descenso voar ata una distancia segura antes de esgotar o seu combustible tal e como estaba planificado.

Categorías
Uncategorized

Mars Perseverance Sol 0

Créditos da imaxe: NASAJPLMars 2020

Explicación: Despois de 203 días, unha viaxe interplanetaria, e sete minutos de terror, Perseverance posouse sobre Marte. A confirmación do éxito da amartizaxe foi anunciada polo Jet Propulsion Laboratory da NASA no sur de California ás 12:55 pm PST (Pacific Time, 8:55 pm UTC) do 18 de febreiro. A cámara de prevención de riscos dianteira esquerda (Hazcam) do rover do tamaño dun coche tomou esta imaxe inicial en baixa resolución pouco despois da aterraxe no Sol 0 da misión. A cuberta protectora está aínda sobre a cámara, pero a sombra do Perseverance, agora o rover máis ambicioso enviado ó Planeta Vermello é visible a través da súa proxección na superficie marciana.