Categorías
Uncategorized

Noite de Perseidas

Crédito do vídeo e Copyright: Vikas Chander e Dorje Angchuk; Música: Tea Time via PremiumBeat

Explicación: algunha vez viches unha choiva de meteoros? Para capturar tal marabilla realizouse un vídeo durante o pico da recente choiva das Perseidas sobre o Observatorio Astronómico Hindú en Hanle, India, situado na cordilleira do Himalaia. O vídeo comeza ao caer a noite co plano central da Vía Láctea aparecendo dende a esquerda mentres varios satélites artificiais orbitando a Terra cruzan por riba. Durante a noite, o brillo dos meteoros normalmente dura un segundo aínda que no vídeo estendeuse artificialmente. O brillo verdoso que amosa moitos meteoros é tipicamente causado pola vaporización do níquel. A medida que o vídeo continúa, Orión elévase no horizonte e os meteoros destelan sobre o Telescopio Chandra do Himalaia e o Telescopio de Raios Gamma de Alta Enerxía (Hagar). A película de 2 minutos e 30 segundos remata coa saída do Sol, precedido por un falso solpor de luz zodiacal.

Categorías
Uncategorized

Desenrolado: cinco décadas dun selfie lunar

Crédito da imaxe: NASAApollo 11Neil Armstrong; Procesado: Michael Ranger

Explicación: aquí está unha das fotos máis famosas da Lúa, pero invertida dixitalmente. O Apolo 11 aterrou na Lúa en 1969 e tomáronse moitas imaxes incluíndo está icónica fotografía de Buzz Aldrin realizada por Neil Armstrong. A imaxe orixinal non só capturaba a magnífica desolación dun mundo descoñecido, se non ao propio Armstrong reflexado no visor curvado de Aldrin. Aquí, é onde xoga o seu papel a moderna tecnoloxía dixital. Na imaxe amosada, a distorsión esférica do casco de Aldrin foi revertida. O resultado é a famosa fotografía, pero agora protagonizada polo propio Armstrong dende a perspectiva de Aldrin. Polo tanto, xa que Armstrong realizou a foto, esta imaxe é de feito un selfie lunar de cinco décadas de antigüidade. O reflexo orixinal no visor amósase á esquerda, mentres a Terra aparece no ceo lunar arriba á dereita. Unha das patas recubertas do módulo lunar Eagle destaca tamén na imaxe. Os preparativos para retornar humanos á Lúa durante os próximos anos inclúen o programa Artemisa, unha colaboración internacional liderada pola NASA.

Categorías
Uncategorized

Lúa de colleita

Crédito da imaxe e Copyright:Mike Cohea

Explicación: famosa por festivais, historias e cancións, a lúa chea máis coñecida posiblemente sexa a Lúa de colleita (Harvest Moon). No hemisferio norte este é o nome tradicional para a Lúa chea máis próxima ao equinoccio de setembro. Vista dende Saunderstown, Rhode Island, planeta Terra, esta Lúa de colleita deixa un ancho ronsel de tons cálidos ao elevarse no luscofusco sobre a ponte de Newport. O 20 de setembro a Lúa foi fotografada nunha única exposición de 22 minutos usando un filtro denso e unha cámara dixital. Só dous días máis tarde en setembro o equinoccio marcou o cambio de estación e o comezo do outono no hemisferio norte. De feito, sendo unha estación o tempo entre o solsticio e o equinoccio, esta Lúa de colleita foi a cuarta lúa chea da estación, xusto despois do final astronómico do verán no hemisferio norte.

Categorías
Uncategorized

Equinoccio na Terra

Crédito do video: Meteosat 9NASAearthobservatoryRobert Simmon

Explicación: cando se volve vertical a liña que separa a noite e o día? Hoxe. Hoxe é o equinoccio na Terra, un momento no ano cando o día e a noite son case iguais. No equinoccio, o terminador da Terra, a liña que divide o día e a noite, vólvese vertical e conecta o polo norte co polo sur. No video en time-lapse demóstrase isto amosando un ano enteiro no planeta Terra en 12 segundos. Dende a órbita xeosíncrona, o satélite Meteosat 9 gravou estas imaxes da Terra no infravermello tódolos días á mesma hora local. O vídeo comeza no equinoccio de setembro de 2010 co terminador sendo unha liña vertical. Cando a Terra xira ao redor do Sol, o terminador inclínase de tal xeito que cada vez hai menos luz solar no hemisferio norte, causando o inverno. Cando o ano progresa e chega a marzo de 2011, o equinoccio chega de novo na metade do vídeo seguido do terminador inclinándose no outro sentido, causando o inverno no hemisferio sur e o verán no norte. O ano reflexado no vídeo finaliza de novo no equinoccio de setembro, concluíndo outro dos miles de millóns de órbitas ca Terra xirou (e xirará) ao redor do Sol.

Categorías
Uncategorized

Manchas solares no outeiro

Crédito da imaxe e Copyright: Jordi Coy

Explicación: a bola laranxa vai baixar rodando polo outeiro? Non, por que a bola laranxa xigante é en realidade o noso Sol. A estrela central do noso Sistema Solar aparece nesta imaxe saíndo por detrás dun outeiro na Terra fai 12 días neste primeiro plano perfectamente detallado. O disco do Sol amosa 5 manchas solares, bastantes considerando que durante o mínimo de actividade solar dos últimos anos apenas houbo manchas. Unha ollada de preto ao outeiro Sierra del Cid en Petrel, España, revela non só a silueta dos piñeiros se non tamén a silueta de persoas, casualmente os tres irmáns do fotógrafo. As árbores e os irmáns atópanse a 3.5 quilómetros de distancia durante esta ben planificada imaxe tomada de mañá nunha soa exposición. Un filtro escuro anula o brillo do Sol e revela con gran detalle as manchas solares. Nuns minutos, o Sol elevouse por riba do outeiro, mentres que nunha semana as manchas rotaron ao redor do Sol ata desaparecer da vista. Pero a escena capturada na fotografía está agora conxelada no tempo para o desfrute de todos.